وصلت البيت حكايات رومانى مكرم 2
اتأخد علاء في عربية الترحيلات، ورجعت أنا ويوسف والأستاذ عادل للقاهرة.
تاني يوم الصبح، كانت الأخبار انتشرت في العيلة زي النار في الهشيم. سامح طلق سعاد طلاق بائن ورمى هدومها في الشارع، ومكتبها العقاري اتقفل بالشمع الأحمر بقرار من المحكمة بسب قضايا التزوير وفروق الإيجارات المتأخرة. أما شركة “الشهاب للهندسة”، فمجلس الإدارة فصل علاء رسمياً من منصبه كمدير، ورفعوا عليه قضية إساءة أمانة وتشويه سمعة الشركة.
قعدت في مكتبي الجديد في عمارة المهندسين، المكتب اللي كان أصل ملكيته لعمي توفيق والنهاردة بقى المقر الرئيسي لشركتي الجديدة “الألفي لإدارة الأصول والتطوير العقاري”.
الأستاذ عادل دخل عليّ ومعه ملفات جديدة وحطها قدامي على الترابيزة: “صباح الخير يا كريمة هانم.. النيابة أمرت بتجديد حبس علاء 15 يوم على ذمة التحقيق في قضايا الخطف والابتزاز والتزوير. وسعاد أترفع عليها قضية إفلاس رسمي وتزوير عقود رسمية.”
بصيت للأوراق بهدوء، رفعت رأسي وبصيت من شباك المكتب الكاشف للقاهرة كلها. الشورة كانت واضحة والنصر كان كامل.. بس جوايا كنت عارفة إن الصفحة دي لسة مفيهاش نقطة النهاية.
التليفون المكتبي رن. رفعت السماعة: “ألو؟”
صوت ست جاد وبارد جه من الناحية التانية: “أهلاً يا كريمة هانم.. أنا المحامية الخاصة بـ ‘سعاد هانم’. حبيت أبلغك إن الموكلة مش ناية تسكت، ومعانا مستندات قديمة بخط إيد المرحوم توفيق بيه، بتثبت إن ثلث الثروة دي ملك لسعاد بعقد بيع وشراء مستتر ومسجل من عشر سنين.. نتقابل في المحكمة بكرة، ولا تحبي نحلها ودي؟”
سكنت ثواني وأنا ماسكة سماعة التليفون، والضحكة الباردة اتسربت لملامحي من جديد. المحامية كانت فاكرة إن الكارت ده هيهزني أو يخليني أتردد، بس هي مكنتش تعرف إن الشخصية اللي قدامها النهاردة مش هي نفس كريمة الطيبة الساذجة بتاعة زمان.
رديت بنبرة واثقة وثابتة زي الصخر: “عقد بيع وشراء مستتر ومسجل من عشر سنين؟ والله برافو يا أستاذة.. سعاد لحقت تفبرك الأوراق دي امتى؟ أصل المحامية الشاطرة زي حضرتك لازم تكون عارفة إن عمي توفيق من عشر سنين—وتحديدًا سنة 2016—كان أصلاً بيمر بأزمة صحية وموجود في ألمانيا وبيمضي بختم ورمز كود إلكتروني معتمد من السفارة المصرية هناك، ومش بالخط ولا البصمة اليدوية. نتقابل في المحكمة بكرة يا أستاذة.. بس جهزي موكلتك لقضية تزوير جديدة في محررات رسمية واستعمال محرر مزور!”