حماتي اماني السيد ١
كملت أمي وهي مش مدياها فرصة تنطق:
ـ بنتي مفيش حد يختبرها، أنتِ وابنك اللي سقطتوا من نظري تماماً من دلوقتي.. شبكتكم المعفنة دي هتوصلكم لحد عندكم، وبيتنا متعتبوهوش تاني، جاتكم القرف في قلة أصلكم!
وراحت قفلة السكة في وشها من غير ما تسمع منها حرف، ونهت الحكاية قبل ما تبدأ.
أول ما أمي قفلت السكة في وشها، حسيت إن جبل كان كاتم على نفسي وانزاح. ركبت الميكروباص وراجعة البيت، وأنا طوال الطريق باصة من الشباك وبفكر في “المحروس” خطيبي، اللي كان راسم عليا دور الحنين والراجل اللي بيخاف عليا، وهو بايعني لأمه وشاركها في اللعبة دي. قهرتي منه كانت أكبر من زعلي على الحكاية كلها، بس الحمد لله إن ربنا كشفهم ليا بدري، بعد شهرين بس ومادخلتش البيت ده وأنا مكسورة الجناح.
وصلت البيت، لقيت أمي واقفة مستنياني ووشها لسه أحمر من كتر العصبية والغل. أول ما شافتني، خدتني في حضنها جامد وقالتلي:
ـ ولا تزعلي نفسك يا قلب أمك، أبوكي الله يرحمه مسابليش كوم لحم عشان يترمي للي يسوى واللي ميسواش يتبهدل وراه.. غوري في داهية هي وابنها، اللي زي دول بايعين أصلهم من الأول.
قعدنا وبدأنا نتكلم في الترتيبات اللي جاية، وفجأة لقيت تليفوني بيرن.. مين؟ المحروس خطيبي!
بصيت لأمي، لقيتها بتقولي:
ـ افتحي السبيكر وردي عليه بمنتهى البرود، خليه يسمع الرد اللي يستاهله.
فتحت الخط وقولت بصوت ناشف:
ـ أيوة يا ناصر.
جالي صوته من الناحية التانية وهو صوته عالي ومتعصب، وبدل ما يعتذر أو يلم الدور، لقيت الكبر والغرور عِلو في صوته وقاللي:
ـ إيه اللي أمك عملته ده؟! وإزاي تمشي من عند أمي وتسيبيلها الجلبية وتتطاولوا عليها بالشكل ده؟ أنتِ اتجننتي؟! أنتِ فاكرة نفسك مين عشان ترفضي كلام أمي وتغلطوا فيها؟!
ضحكت بصوت عالي سَمعّه من السبيكر، ضحكة برود قهرت عصبيته وزودت غيظه، وقولتله:
ـ فاكرة نفسي مين؟ أنا ست البنات اللي أمك افتكرت إنها جايباها من الشارع عشان تلم ورا بناتكوا! وأنت فاكر نفسك راجل؟ وأنت مركب قراقر لأمك ومؤكدة عليك تتأخر ومشاركها في التمثيلية الرخيصة دي عشان تختبروني؟
صوته مِعلش أكتر، وبدأ يلوّي الكلام وقاللي بلجلجة:
ـ وأمي غلطت في إيه؟ أمي كانت بتشوف شطارتك، وأي واحدة أصيلة كانت هتدخل وتشمر وتعمل ده من سكات عشان تِكبر في نظر حماتها ونظري! لكن أنتِ طلعتي مش وش نعمة، وأمك داخلة تشتم وتهزأ.. لو مفكرتيش ترجعي تبوسي إيد أمي وتعتذريلها وتوضبي الشقة دي من سَاسها لـ رَأسها، اعتبري نفسك طالق.. قصدي الخطوبة دي مفسوخة!