سلفتي وحماتي ج 2 حكـايات مني السيد
. خلينا نشوف مع بعض يا بشمهندس. طلعت ورقة وبصيت فيها: — عقد توريد حديد التسليح لمشروع “الربوة”.. السعر المسجل في الفواتير أعلى من سعر السوق بـ ١٥٪، والشركة الموردة مسجلة باسم “سيد الهواري”.. وسيد ده يبقى خال حضرتك يا بشمهندس، صح ولا أنا غلطانة؟ محمود لسانه اتعقد، وعينه بدأت تلف في القاعة، وعرق بارد نزل على جبينه: — دي.. دي مناقصة عادية يا فندم، وخالي شركته معروفة ومفيهاش أي شبهة! قاطعه الحج رأفت بحزم: — مناقصة إيه وإنت الوحيد اللي وافقت عليها من غير ما تعرضها على لجنة المشتريات الرئيسية؟! إنت استغليت غياب الرقابة في الفرع وافتكرت إن الشركة مال سايب عشان أنا كنت سايب لك الحبل على الغارب عشان خاطر المرحوم فؤاد!
محمود دمعت عينه من التوتر، ووجه كلامه ليا بنبرة كان بيحاول يخليها مكسورة عشان يستعطفني: — ندى.. إنتِ بتعملي كدة ليه؟ عشان خلافاتنا الشخصية؟ عشان اللي حصل إمبارح؟ إحنا عشرة تلات سنين، وما يصحش تصفي حساباتك معايا قدام الموظفين بتوعي! ضحكت بسخرية، وصوتي كان واضح وقوي: — خلافات شخصية؟! إنت اللي خلطت بين البيت والشغل لما نسيت نفسك وافتكرت إنك بنيت نفسك بمجهودك يا محمود.
نسيت يوم ما كنت بتستلف مني تمن المواصلات عشان تروح تقدم في الانترفيو؟ نسيت لما كنت بتعيط في الصالة وتقولي الدنيا مقفلة في وشي، وأنا رحت لأبويا الله يرحمه وركعت تحت رجليه عشان يكلم الحج رأفت يشغلك هنا؟ سكت ثانية وأنا شايفة الدموع محبوسة في عينيه من قمة الإحراج قدام كل زمايله اللي كان بيتعالى عليهم طول السنة اللي فاتت. كملت كلامي:— أبويا اللي رفضت تخليني أزور قبره في ذكرى وفاته الأولى.. هو ده نفسه اللي لحم كتافك من خيره!
والمنصب والبدلة والعربية اللي سايقها، كله كان بفضله بعد ربنا. وإنت جيت إمبارح تقولي: “لو أبوكي أهم من جوزك، اختاري ورقة الطلاق”! وأنا اخترت.. وجيت النهاردة استلم حقي وحق أبويا. محمود نزل راسه في الأرض، القاعة كلها كانت بتبص له باحتقار بعد ما اتكشفت حقيقته وجحوده. الحج رأفت اتنحنح ووجه كلامه للمستشار القانوني: — أستاذ سامح.. القرار إيه بناءً على المخالفات دي؟ رد الأستاذ سامح: — قرار مجلس الإدارة هو إيقاف المهندس محمود عن العمل فوراً، وتحويل كل ملفات العقود اللي وقعها خلال السنة الأخيرة للشؤون القانونية والجهاز المركزي للمحاسبات للتحقيق في شبهة إهدار أموال الشركة وتضارب المصالح، مع التحفظ على مستحقاته المالية وتجميد صلاحياته الإدارية.