حماتى كل شهر بتاخد كرتونه التموين بتاعتى
لمحة نيوز
وفي الصبح، لما فتحت كشف الحساب اللي خبّوه عني سنتين اكتشفت إنهم ما كانوش بيسرقوا أكل بيتي بس. اكتشفت إن مرتب جوزي اللي كان بيفهمني إنه يدوب بيقضي الإيجار والأقساط، كان بينزل منه نصه بالظبط كل أول شهر كتحويل بنكي دوري على حساب حماتي! السنتين اللي عشتهم في حرمان، السنتين اللي كنت ببات فيهم والدمعة على خدي وبستلف من أمي تمن كيلو طماطم، كان جوزي بيحوش لحماتي وأخته في الحساب ده تحت مسمى مصاريف لبيت العيلة.
مش بس كده.. الصدمة الأكبر كانت لما بصيت في خانة الإيداعات الكبيرة، لقيت إيداع بقيمة 100 ألف جنيه من سنة كاملة.. الفلوس دي كانت مكافأة نهاية الخدمة بتاعة بابا الله يرحمه، وجوزي كان قايلي إنه حطها في شهادة باسمي عشان تأمن مستقبلنا، ولما كنت بطلب منه العائد بتاعها كان بيقولي العائد بيتحول تلقائي على قسط الشقة. لكن الحقيقة إن الشهادة كانت باسمه هو.. وكسرها وأداها لأمه عشان تفتح بيها السوبر ماركت الجديد لأخته!
وقفت في وسط الصالة والورق في إيدي، وجسمي كله بيترعش من القهر.. السنتين دول مروا قدام عيني كأنهم فيلم رعب، أنا كنت مغفلة لدرجة إني ببيع حتة الذهب اللي حيلتي عشان آكل، وهم بيعملوا ثروة ومشاريع من قفايا وقفا أبويا الله يرحمه!
مكملتش
دقيقتين ولقيت الباب بيترزع، وجوزي داخل وعيونه حمرا من الغضب، ووراه حماتي وأخته.. داخلين كأنهم هما أصحاب الحق!
جوزي زعق وهو بيشد الورق من إيدي:
— إنتِ إزاي تتجرأي وتروحي البنك وتطلعي كشف حساب؟! وإزاي تلغي بطاقة التموين وتعملي بدل فاقد وتفصليها عن بطاقتي وبطاقة أمي؟! إنتِ اتجننتي؟!
حماتي ساندة على أختها وبتصوت:
— بقا تروحي تشتكينا في مكتب التموين وتقوليلهم إننا بنبيع التموين في السوق السودا؟! البقال اتصل بيا وقالي اسمي نزل في المخالفات والبطاقة وقفت! عاوزه تخربي بيتنا وتضيعي قرشنا يا خطافة الرجالة؟!
بصيتلهم بمنتهى البرود، البرود اللي بيجي بعد ما الصدمة تكسر كل حتة فيك وميبقاش عندك حاجة تخاف عليها.. قعدت على الكرسي وحطيت رجل على رجل وقلت:
— أنا متبلتش عليكي يا حماتي.. إنتِ مش قولتلي اتعلمي تدبري بيتك؟ وأهو أنا اتعلمت.. أول حاجة عملتها إني وفرت تمويني اللي كنتِ بتبيعيه وتدخلي تمنه في جيبك وجيب بنتك. وتاني حاجة، بلغت عن بقال التموين بتاعكم إنه بيبيع السلع المدعمة لحسابكم.. يعني من بكرة الصبح، مفيش كراتين زيت وسكر هتدخل البيت ده تاني عشان تتاجري فيها.