أبويا صورني و انا بخدمهم ج 2 حكايات منــال عـلـي
الجزء الثاني والأخير
“تاني يوم الصبح… أول رسالة وصلتلي كانت: (الفيزا اترفضت!)… ولأول مرة في حياتي، ما جريتـش أحل المشكلة.”
صحيت الصبح، عملت فنجان قهوة، وقعدت في البلكونة أبص للشارع.
يمكن لأول مرة من سنين… صحيت وأنا مش بفكر مين ناقصه فلوس، أو مين مستني مني أحل له أزمة.
الموبايل رن.
رسالة من نور.
“إيه اللي عملتيه؟ الفيزا اترفضت وأنا في البنزينة!”
بصيت للرسالة شوية.
زمان؟
كنت هقوم أجري أكلم البنك.
أشوف إيه المشكلة.
وأعتذرلها كمان.
لكن المرة دي…
قفلت الرسالة، وكملت أشرب القهوة.
بعدها بخمس دقايق…
اتصلت.
طننت عليها.
رجعت اتصلت.
طننت.
لحد ما بعتت:
“ردي عليا يا آية… العربية واقفة ومش عارفة أعمل إيه.”
ابتسمت ابتسامة صغيرة، وقلت لنفسي:
“يمكن لأول مرة… تتصرف بنفسها.”
—
بعد الضهر بشوية…
الموبايل رن.
أبويا.
رديت.
أول ما سمع صوتي، صرخ:
— إنتي اتجننتي يا بنت؟
قلت بهدوء:
— صباح الخير يا بابا.
قال بعصبية:
— صباح إيه؟ إنتي وقفتي الفيزا بتاعة أختك ليه؟
قلت:
— لأنها مش فيزتها.
دي فيزتي أنا.
سكت ثانية.
وبعدين قال:
— يعني تسيبي أختك تتبهدل؟
قلت:
— وأنا لما كنت بتبهدل عشان أدفع ديونها… حد كان بيسأل؟
—
أمي خدت الموبايل بسرعة.
وقالت بصوت كله استعطاف:
— يا حبيبتي… دي أختك.
قلت:
— آه… أختي.
بس أنا مش البنك بتاعها.
ولا الجمعية الخيرية بتاعت البيت.
—
قالت:
— إحنا عمرنا ما قصرنا معاكي.
ضحكت.
قلت:
— بجد؟
طب فاكرين آخر مرة سألتوني أنا محتاجة إيه كانت إمتى؟
سكتوا.
قلت:
— فاكرين آخر مرة جبتولي هدية؟
آخر مرة عزمتوني على الغدا؟
آخر مرة قولتولي ارتاحي وإحنا هنشيل عنك؟
ولا كل اللي فاكرينه…
إني بدفع؟
—
أبويا شد الموبايل منها وقال بعصبية:
— بعد كل اللي عملناه عشانك…
قاطعته.
وقلت:
— لا يا بابا…
بعد كل اللي أنا عملته عشانكم.
أنا اللي دفعت أقساط نور.
وأنا اللي كنت بجيب دواك.
وأنا اللي بدفع تأمين العربية.
وأنا اللي شيلت مصاريف البيت لما خرجت معاش.
وفي الآخر…
صورتني قدام الناس وقلت عليا “الشغالة”.
—
سكت.
أول مرة…
أبويا يسكت.
قلت:
— تعرف أكتر حاجة وجعتني؟
مش الفيديو.
ولا الكلمة.
اللي وجعني…
إنكم كنتوا شايفين ده عادي.
—
وقفلت السكة.
—
من اليوم ده…