جمعيه حكايات امانى السيد
— فيه إيه يا علي؟ إيه التهريج ده؟ مين الناس دي؟
المحامي بتاعي تقدم بثبات:
— الأستاذ علي جوز بنتك متهم في قض\ية تبديد منقولات زوجية وحيازة ممتلكات مسروقة، واحنا بننفذ قرار المعاينة والحفظ على المنقولات تمهيداً لصدور قرار الضبط وإحضار واسترداد الممتلكات لحيازة موكلتي.
أبو العروسة بص لـ علي بصدمة:
— الكلام ده صحيح؟ العفش ده بتاع مرتك القديمة؟ أنت ضحكت علينا وقلت لنا إنك مجدد وحاطط شقاك في البيعة؟
علي بقى يأتأت ومش عارف يجمع جملة مفيدة:
— يا عمي.. الموضوع فيه لبس.. دي كذابة وعاوزة تنتقم مني عشان طلقتها!
طلعت الفواتير الموثقة وأوراق الجمعيات اللي عليها توقيعه كضامن واستلام للفلوس، ورميتها قدام أبو العروسة:
— اتفضل يا حاج.. شوف كذب جوز بنتك. شوف الرسائل بصوته وهو بيتحايل عليا أدخل الجمعية الأخيره عشان نوضب الشقة، وشوف التواريخ. الراجل ده خد فلوسي وعفشي وجاب بيه بنتك هنا.
أبو العروسة مسك الورق، وقرأ التواريخ، وشاف صور الجمعية واستلام الفلوس. وشه اتغير 180 درجة، وبص لـ علي بنظرة احتقار ما شفتهاش في حياة حد:
— يا خسارة الرجولة! أنت تطلع محتال؟ بتتجوز بنتي بعفش وشقى ست ثانية؟
العروسة قعدت على الكنبة وهي بتصرخ وبتخلع الدهب اللي في إيدها وترميه في وشه:
— يا خاين! يا نصاب! طلقني! أنا مش هقعد مع واحد حرامي سرق شقى مراته!
المكان تحول لساحة حرب. علي كان واقف في النص، عريان قدام الكل. كذبه، وغدره، وتخطيطه الرخيص، كله انكشف في ساعة زمن. الجيران على السلم كانوا بيتهامسوا وبيصوروا بالموبايلات، وأبو العروسة بيزعق ويهدده بالضرب، والشرطة بتستكمل محضرها بكل رسمية.
أنا كنت واقفة في وسط المعمعة دي كلها، مش حاسة بأي توتر. بالعكس، حسيت بنسيم حريتي بيرجع لي. الوجع اللي كان جثم على صدري طول الشهر فات اتلاشى ورا منظر علي وهو بيتوسل للشرطة والمحامي ونسيبه الجديد إنهم يسمعوه ومحدش فارق معاه كلامه.
أمين الشرطة بص لـ علي وقال بصرامة:
— اتفضل معانا على القسم يا أستاذ عشان تتأخذ أقوالك في محضر التبديد والإدلاء بأقوال كاذبة والتزوير في أوراق ماليّة.
علي وهو بيتسحب من إيده قدام العمارة والناس كلها بتتفرج عليه، بص لي ونظرة التوسل في عينه كانت أصلح رد لي على كل ليلة قضيتها بعيط وبسأل نفسي “أنا عملت إيه؟”.